Xoverdayîşê hemsereka KCDyî û parlementera HDPyî Leyla Guvena ke seba wedarnayîşê tecrîdê serê Rayberê PKKyî Abdullah Ocalanî grevê vêşanîye de ya roja 102. de yo. Rewşa weşîya Guvena çend şona xirabêr bena.
Xoverdayîşê grevê vêşanîye ke hemverê tecrîdkerdişê Rayberê PKKyî Abdullah Ocalanî de bi serkêşîya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke dest pêkerdbî, roja 102. de dewam kena. Leylaye seba wedarnayîşê tecrîdo girankerde ke serê Rayberê PKKyî Abdullah Ocalanî de yeno meşnayene, 8ê Teşrîna Peyêne de Zindanê Amedî de dest bi grevê vêşanîye kerdbî û badê ke 25ê Çele de serbest ameybî veradayene keyeyê xo de çalakîya xo dewam kena. Badê Guvene çalakî vilayê Amed, Hewler, Firansa, Mexmûr, Şengalê û Silêmanî zî bî.
Weşîya Guvene çend şona xirabêr bena
Rewşa weşîya Guvene çend şina xirabêr bena. Ame vatene ke, tansîyonê Guvene zaf kewto, bêhal bîya, problemê sey hewnî, zor şimitişê awe, krampê madeyî estî û hemverê boye û roşinî de zêde hesasbîyayîş virazîyayê.
Çalakîya grevê vêşanîye dewam kenî
Sewbîna çalakîya Endamê Meclîsê HDPyî Nasir Yagizî ke Hewler bi eynî taleban dest pêkerdbî zî roja 89. de, çalakîya grevê vêşanîye ya Strasbaurgî ke 14 çalakgerî grevê vêşanîye de yî û ya Îmam Şîş yê Gallerî roja 63. de û çalakîya koma ewil ke 16ê Kanûne de zindanan de dest pêkerdbî zî roja 62. de dewam kena. Çalakîya endama Meclîsê Îştar ya Mexmûrî Fadîle Toke roja 29. de û çalakîya Hemsereka DBPyî Sebahat Tuncel û parlamentera HDPyî ya Colemêrgî ya verê Selma Irmake zî roja 34. dewam kena.
Nika pêropîya zindanan de 300 ra zêde hepsîyê sîyasî grevê vêşanîye yê bêdem û anêgêrayîşî de yî. AMED
