Xoverdayîşê Hemsereka KCKyî û Parlementera HDPyî Leyla Guvene kewt roja 80. Guvena ke seba wedarnayîşê tecrîdo girankerde ke serê Rayberê PKKyî Abdullah Ocalanî de yeno meşnayene kewtbî grevê vêşanîye yê bêdem û anêgêrayîşî vizêr ameye tehlîyekerdiş û çalakîya xo keyeyê xo de dewam kena.
Xoverdayîşê grevê vêşanîye ke hemverê tecrîdkerdişê Rayberê PKKyî Abdullah Ocalanî bi serkêşîya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvene dest pêkerdbî, her ke şono hîra beno. Leyla Guvene seba wedarnayîşê tecrîdê serê Rayberê PKKyî Abdullah Ocalanî 8ê Teşrîna peyêne de dest bi grevê vêşanîye kerdbî û ewro roja 80. de ya.
Çalakîya Endamê Meclîsê HDPyî yê Nasir Yagizî ke Hewlerî de seba eynî waştişan dabî dest pêkerdiş zî roja 67. de dewam kena. Çalakîya Strasbaurgî zî roja 41. û çalakîya koma ewil ke 16ê Kanûne de zindanan de dest pêkerdbî zî roja 42. de dewam kena. AMED
