Xoverdayîşê grevê vêşanîye yê bêdem û anêgêrayîşî yê Hemsereka KCDyî û Parlementera HDPyî Leyla Guvena ke seba wedarnayîşê tecrîdê serê Rayberê PKKyî Abdullah Ocalanî dabî dest pêkerdiş roja 145. de dewam keno. Xoverdayîşê grevê vêşanîye yê bêdem û anêgêrayîşî yê zindanan zî roja 107. de, xoverdayîşê Nasir Yagizî roja 132. de û xoverdayîşê 14 çalakgeranê Strasbourgî zî roja 106. de dewam keno
Çalakîya grevê vêşanîye ya bêdem û anêgêrayîşî ya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke seba wedarnayîşê tecrîdê serê rayberê PKKyî Abdullah Ocalanî dabî destpêkerdiş roja 145. de dewam kena. Leylaye 8ê Teşrîna Peyêne de Zindanê Amedî de dest bi grevê vêşanîye kerde û badê ke 25ê Çele de serbest ameye veradayene keyeyê xo de çalakîya xo dewam kena. Ganî bêro vîrvistiş ke rewşa weşîya çalakgeran her ke şona xidar bena. Sewbîna 16ê Kanûne de zindananê Tirkîye de zî çalakîya grevê vêşanîye dest pêkerdbî û 1ê Adare de zî vilayê pêroyê zindanan bîye.
Sewbîna çalakîya endamê HDPyî Nasir Yagirzî ke seba eynî taleban Hewlêrî de dest bi grevê vêşanîye kerdbî zî kewte roja 132. Çalakîya 14 çalakgeranê bajarê Strasboûrgî yê Fransa û Îmam Şîşî yê Gallerî zî kewte roja 106. Grevê vêşanîye yê bêdem û anêgêrayîşî ke zindananê bakurê Kurdistan û Tirkîye de bi tewrbîyayîşê 317 hepsîyan ra zêde dest pêkerdbî zî roja 107. xo dima vera da. Sewbîna Mexmûr, Hewlêr, Şengal û xeylê cayanê cîya-cîyayan de zî seba piştîdayîşê grevê vêşanîye çalakîyê grevê vêşanîye pê yenî.
Nê hepsîyan ra yew zî Sedat Akinî yo. Akino ke Zindanê Tîpa Eyî yê Erzinganî de seba wedarnayîşê tecrîdê serê Rayberê PKKyî Abdullah Ocalanî kewt grevê vêşanîye û badê ke 19ê Sibate de serbest ame veradayene keyeyê xo yê qezaya Dêrikî ya Mêrdînî de çalakîya xo roja 75. de dewan keno. Ganî bêro vîrvistiş ke rewşa weşîya çalakgeran her ke şona xidar bena. AMED
