Artêşa Iraqî serê sibayî yê 20ê gulane ra nata pê wesayîtanê zirxînan û hêzanê xo kena ke dormeyê Kampa Multecîyan a Şehîd Rûstem Cûdîyî ya Mexmûrî pê têlan bigêra û kuleyan awan bikera. Vera ney xoverdayîşê roniştoxanê Mexmûrî roja hîrêyîne de dewam keno.
Şar xeyman de nobete keno û vano ke heta ke artêşa Iraqî xo apey nêşora xoverdayîşê xo rê dewam bikero.
Xoverdayoxanê nobete ra Fatma Cizîrî îfade kerd ke dewleta Iraqî înan rê neheqîye kena. Fatma vat: “Cara tîya seke zîndano serakerde yo. Hînî ê ma ra çi wazenê? Ma do heta peynî xo ver bidê.”
Nika xoverdayîşêko bêhempa est o
Cinîya ciwane Jîyane Posat ard ziwan ke artêşa Iraqî kena ke debikewa kampe û vat: “5 noqtayan de artêşe hêrişê ma kerd. Nika xoverdayîşêko bêhempa est o. Ciwan û dadîyî hê xo ver danê. Ganî şarê Başûrî, Neteweyê Yewbîyayeyî û şarê ma yê Ewropa paştî bidê xoverdayîşê ma. Ma ablûqaya têlan nêwazenê. Artêşa Iraqî îdîa kena ke şar ney wazena la şar nêwazeno. 30 serrî yo ma xo bi xo pawenê, hewceyê ma bi înan çin o. Eke ê wazenê ma bipawê wa hêrişanê hewayî vindarnê.” MEXMÛR
