Çalakîya Nasir Yagizî yo ke seba wedartişê tecrîdî grevê vêşanîye yê bêdem-bêagêrayîşî de yo kewte roja xo ya 120ine, her roja ke şina halê weşîye yê Yagizî hîna bena xirab
Xoverdayîşê grevê vêşanîye yê ke seba wedartişê tecrîdê serê Rayberê Şarê Kurdî Abdullah Ocalanî dest pêkerdîbî dewam kenê. Nasiro Yagizo ke serkêşanê nê xoverdayîşî ra yew o, çalakîya ci ya grevê vêşanîye kewt roja 120’ine. Yagizo ke her roja ke şina halê ci yê weşîye hîna beno xirab, derheqê halê xo de ANF’yî rê qisey kerd. Yagizî vat ke dejê sere, made û pîzeyî estê û problemê ci yê rakewtişî zî esto û ard ziwan ke rîyê problemanê çiman ra zaf zehmetîyan anceno.
Yagizî vat o 24 saetan de ancax eşkeno 2-3 saetî rakewo, rixmê nê problemanê weşîye de zî moral û coşê ê nêbîyo kemî û va: “Proseso ke ma tede yê û xoverdayîşo ke ma ciwîyenê amac û manaya çalakîya ma ano ma vîrî. Tewirê şarê ma moralê ma hîna keno vêşî û heme tengasîyanê ma bi ma dano vîrrakerdene.”
Hunermend Dîyar Dêrsimo ke şi serdana Nasir Yagizî bale ante ke dewleta Tirkî hemverê Kurdan de polîtîkaya çinkerdişî bica ana. Dîyar Dêrsimî vat dewleta Tirkî ya ke serê Rayberê Şarê Kurdî Ocalanî de tecrîdî kena giran, Kurdan ser o zî koletî ferz kena û va: “Înan Vakurê Kurdistanî açarnayo zîndan. Hemverê polîtîkayanê dewleta Tirkî de do xoverdayîşê grevê vêşanîye bi ser bikewo û faşîzm vînî bikero.”
Hetê bînî ra heyetêk Meclîsê Cinîyan ê Vakur û Rojakewtena Sûrîye ra seba paştîdayîşê xoverdayoxanê grevê vêşanîye ameyî temsîlkarîya HDPyî ya Hewlêrî.
Mexmûr
Grevê vêşanîye yo ke Kampa Şehîd Rustem Cûdî (Mexmûr) de 16ê Kanûne de dest pêkerdibi roja xo ya 94. de yo. Çalakîya grevê vêşanîye yo ke bêdem û biagêrayîş o hetê grûba 31ine ra amî dewrgirewtene. Grevê vêşanîye yê endama Koordînasyonê Meclîsê Îştarî yê Mexmûrî Fadîle Toke ke bi hawayêkê bêdem û bêagêrayîşî domnena zî kewt roja xo ya 59ine. Çalakwananê grevê vêşanîye ra Bapîr Yildizî, Roşanê Newroze yê Rayberê Şarê Kurdî Ocalanî, yê Leyla Guvene, Nasir Yagizî, Fadîle Toke, yê xoverdayoxanê zîndanan û yê şarê Kurdî pîroz kerd û vat ke heta ê netîce bigêrê do xoverdayîşê xo bidomnê.
Selemanîye
Grevê vêşanîye yo ke 97 rojî yo Komela Karkeran a Mezopotamya ya Silêmanîye de dewam keno hetê grûba 49ine ra ame dewrgirewtene.
Grevê vêşanîye başûr de vila benê
Xoverdayîşê grevê vêşanîye xeylî bajaranê Başûrê Kurdistanî de vila bîyî. Endama Têgêrayîşê Azadîye ya Meclîsê Herêma Germîyanî Gulebax Celale zî 3 rojî yo ke kewta grevê vêşanîye yê bêdem-bêagêrayîşî. Dewa Tatan a pabesteya qezaya Penciwênî de Fatma Ehmede nizdê hewteyêk o ke grevê vêşanîye de ya.
Kelar de grevê vêşanîye yê Herêm Mehmûdî roja xo ya 26ine de dewam keno, grevê vêşanîye yê Şeyma Ednane ke seba mengêk dabi destpêkerdene zî kewt roja xo ya 18ine. Endama Têgêrayîşê Azadîye (Tevgera Azadî) Ronak Mecîde zî 14ê Adare de seba hewteyêk dest bi grevê vêşanîye kerdibi. Grevê Mecîde roja xo ya hewtine de dewam keno. Ciwanêk bi nameyê Teha Cafî zî 16ê Adare de dest bi grevê vêşanîye kerd. HEWLÊR
