Xoverdayoxanê rojeyê mergî ra Erol Cengîzî va ‘Se beno wa bibo ma do çalakîya xo bidomnê û seba hîsdarbîyayîşî veng da’
Çalakgerê ke hemverê tecrîdkerdişê Rayberê Şarê Kurdî Abdullah Ocalanî 1ê Adare ra nata grevê vêşanîye de bîyî 30ê Gulane de grevê xo açarnabi rojeyê mergî. Nê çalakgeran ra yew zî Erol Cengîz o ke 7 serrî yo Zîndanê Wanî yê bi Asayîşê Berzî de maneno. Erol Cengîz 50 rojî Zîndanê Wanî yê bi Asayîşê Berzî de bi tana sereyê xo hucre de ame verdayene.
Kekê ê Sedat Cengîzî ard ziwan ke roja Çarşemeyî o şîyo pêvînayîşê birayê xo û va: “Mi ê ra vat ‘ti nêeşkenê payan ser o vinderê, ti zaf bîyê zihîf.’ Ê zî mi ra vat halê ê rind o û kerd ke moral bido mi. Ê vat heta tecrîd wedarîyo se beno wa bibo o do çalakîya xo bidomno. Heman wextî de waşt, merdimê ke teber de yê bibê vengê înan.
‘Ma do mudaxeleyî qebûl mekerê’
Sedat Cengîzî ard ziwan welat de çîyêk bi nameyê edaletî nêmendo û va: “Zafaneyê merdimanê ke nika Tirkîya de tepişte yê bêguna yê. Tekane çîyo ke ma wazenê edalet o û qedîyayîşê tecrîdî yo. Her kesê ke tewrê xoverdayîşê bîyê merdimê ercayeyî yê.”
Avûkatê Erol Cengîzî yo ke ê dir pêvînayîş kerdibi keyeyî ra vat ke halê tepişteyanê ke grevê vêşanîye de yo bîyo xirab û hendî nêeşkenê cayê xo ra hurzê. Avûkatî vat ê îdareyê zîndanî dir qisey kerdo û înan ra persayo tirêm ê do hemverê nê halê giranî de se bikerê. Mudirê zîndanî zî ci ra vato ‘ambûlanse verê berî de ya,’ labelê xoverdayoxî vanê ê do çi rey mudaxele qebûl mekerê. STÛTTGART
