Hemserekê OHDyî avûkat Bunyamîn Şekerî ard ziwan ke xoverdayoxê Zîndanê Xarpêtî sewqê nêweşxaneyî nêbîyî û lîsteyê dîyetî kantîn de nêyo
Zîndanê Kampusî yê Xarpêtî yo ke seke ameyo akerdene bi xeberanê binpaykerdişê heqan û muameleyo xirab rojdem de yo de tepişteyê çalakgerî sewqê nêweşxaneyî nêbîyî.
Hemserekê Komeleya Huqûqnasan ya Seba Azadîye (OHD) Bunyamîn Şerkero ke Heyetê Şopnayîşê Grevê Vemşanîye de ca gêno derheqê rawşa xoverdayoxan de ANFyî rê qisey kerd. Şekerî vist vîrî ke înan qedîyayîşê grevê vêşanîye û rojeyê mergî ra dima bi masayêka krîzî û heyetê şopnayîşî dest bi xebat kerd û va: “Ma 8 cayî sey cayanê krîtîkan bewlî kerdî û seba ke tedawîya xoverdayoxan goreyê rewşa înan bêro kerdene embazê xo yê avûkatî nê bajaran ra vila kerdî. 26ê Gulane ra heta 27ê Gulane ma nê herêman de mendî.”
Şekerî ard ziwan ke Erzîngan, Malatya û Ebîstan de bi sebebo ke xoverdayoxî zaf nêbî problemêk nêvejîya û wina dewam kerd: “Zîndanê Xarpêtî yo ke 12 xoverdayoxî menganê Kanûne û Çelê ra dest bi grevî kerdbî estî, de hema zî binpaykerdişê heqan dewam keno. Nê xoverdayoxî nêweşxane rê nêameyî sewqkerdene. Ma her roje şinê Zîndanê Xarpêtî û babete ser o îdare û dozgerî dir yenê têhet. Ê vanê ke ê hesas nizdîyê çalakgerên benê la xoverdayoxî wina nêvanê. Xoverdayoxê ke grûba verêne de bî înan ra tayî goreyê lîsteyê dîyetî yê doktorî wer dîyeno înan la qismêkê înan rê no lîste nêno bicaardene. Ê ke nêrehetîye madeyî ancenê zî sewqê nêweşxaneyî nêbîyî. Waştişê ma oyo ke meşirê nêweşxane zî wa kantînan de lîsteyê dîyetî bibo. Ma do heta peynî rewşa xoverdayoxan taqîp bikerê.” AMED
