Xwendekarên kurd ên ku li Dibistana Bilind a Korkutelî ya Zanîngeha Akdenîzê rastî êrîşa komeke faşîst hatin, ji ber ku ewlehiya jiyana wan nebû ji neçarî dev ji xwendina xwe berdan. Kesên ku êrîşî xwendekaran kirin jî hatin berdan
Li Dibistana Bilind a Korkutelî ya Zanîngeha Akdenîz a Antalyayê 3 xwendekarên kurd di 1’ê mijdarê de li Wargeha Xwendekaran rastî êrîşa faşîstan hatin. Di êrîşê de komeke faşîst a ji 16 kesan pêk dihat ku jixwe re dibêjin ‘ulkucu’ gotin; ‘Em nahêlin kurd û HDP’î li vir bihewin.’ Koma faşîst a ku ciwanên kurd birin odeyeke vala, lê xistibûn.
Piştî bûyerê jî xwendekarên kurd li nexweşxaneyê hatibûn dermankirin û Serdozgeriya Komarê ya Korkuteliyê der barê mijarê de lêpirsîn dabû destpêkirin. Di çarçoveya lêpirsînê de îfadeya 16 kesên faşîst hatibûn girtin û piştre jî hatibûn berdan.
Têkildarî mijarê ji xwendekarên hatine derbkirin û dev ji dibistana xwe berdan Şerîf Saribûlak û Alî Butkul axivîn. Xwendekaran da zanîn ku ewlehiya canê wan nîne û bi vê sedemê jî neçar mane ku dev ji dibistana xwe berdin. Xwendekaran diyar kir ku rêveberiya wargehê ji wan re nivîsek şandiye û jê re gotiye; ‘Divê hûn bi cezayê derketina ji wargehê bên cezakirin.’ ANTALYA
