Endamê HDPyî Nasir Yagiz 100 rojî yo ke grevê vêşanîye de yo û her çiqas ke hetê weşîye ra rewşa ci giran bibo zî çalakîya xo rê dewam keno. Yagiz wazeno ke şar xoverdayoxan rê wayîr bivejîyo û serra 2019î do bibo serra serkewtişî.
Yagizî roja xo ya grevê vêşanîye yê 100. de qisey kerd û peyamo winasî da: “Bi roja 100. ya çalakîya xo, ma vera wisarî şonê. Bi akerdena gul û vilan, ganî ma Rayber Apoyî azad bikê. Ganî şarê ma girewteyanê hepisxaneyan rê wayîrtîye bikero. Hepisxaneyan de îmkanî zaf çin ê. Îdareyê hepisxaneyan girewteyan rê zulim kenê. Hîna ke kes nêbîyo şehîd, ganî şarê ma rawirzo payan ser û xo ver bido. Ganî şarê ma xoverdayoxanê grevê vêşanîye rê wayîrtîye bikero.”
Temsîlkara HDPyî ya Başurê Kurdîstanî Muzeyyen Guneşe zî Nasir Yagizî het de grevê vêşanîye de ya. Guneşe derheqê Yagizî de wina va: “Bi qerardarîye û bi kelecaniye çalakîya xo domneno. Vano ganî ma tecrîdî bişiknê û Rayber Apoyî reyde azad biciwîyê.”
Qaso ke Guneşe vana çimê Yagizî baş nêvînenê, dewqa ci şona û madeyê ey keweno were. Guneşe wina dewam kerd: ”Her çiqas ke hetê weşîye ra rewşa ci başe nêbo zî, hetê moral û motîvasyonî ra zaf baş o. Yagiz heta nika qet bêqerar nêvineto û moral dano embazanê xo. Vano ez bi keyfweşîye Leyla Guvene rê embazîye kena. Vano azadîya Rayber Apoyî, azadîya Rojakewteya Mîyanêne ya.”
Guneşe wina dewam kerd: “Yagiz zîyaretkaranê xo ra vano, ma do serra 2019î bikerê serra xoverdayîş û serkewtişî. Ganî her kes xoverdayîşê ma bivîno. Ma do rayîrê azadîye de canê xo bidê. Beno ke ma şehîd bibê, la seba ke ma kewtê rayîrê xoverdayîşî, ma do qetîya nêbê poşman. Rayîrê ma rayîrê heqîqetî yo. Rayîrê Rayber Apoyî yo û rayîrê pêro Kurdan o.” HEWLÊR
