Endamê Meclîsê HDPyî Nasir Yagizo ke 157 rojî yo vera tecrîdî xo ver ro dano seba pîya xoverdayîşî veng da û va: “Heta ke tecrîd nêro wedaritene ez do xo ver ro bida”
Endamê Meclîsê HDPyî yê Başûrê Kurdistanî Nasir Yagiz, ke vera tecrîdkerdişê Rayberê Şarê Kurdî Abdullah Ocalanî 157 rojî yo bajarê Hewlêrî de grevê vêşanîye de yo, sere de Leyla Guvene, heme çalakwanê grrevê vêşanîye û her kesê ke çarçewaya hemleya “Ma tecrîdî biqedênê, faşîzmî birijnê, Rayber Apoyî azabikerê” de xo ver ro danê, silam kerdî.
Tecrîd bi xurtkerdişê xoverdayîşî encax yeno wedarnayene
Yagizî bale ante serê tecrîdê girankerdeyî yê serê Ocalanî û va: “Ganî şarê ma û dostê ma bêvengîya vera tecrîdî bişiknê. Vera faşîzmê Kurdistan û Tirkîya ganî çalakîyê xoverdayîşî bêrê xurtkerdene. Şarê Kurdî weçînayîşê cayîyan ê 31ê Adare de tewirêko xurt nîşan da, AKP-MHP bin kewt û ameyoxê Kurdistan û Tirkîya bedilîya. Ganî binkewtişê AKP-MHPyî yê weçînayîşî sey neynike bêro dîyayeyene û seba wedaritişê tecrîdî ma xoverdayîşê xo gird bikerê. Coka tecrîd bi xurtkerdişê xoverdayîşî encax yeno wedarnayene. Ma vengê xoverdayîşî berz bikerê.”
Ma do bi têkoşîn û xoverdayîşê xo ser bikewê
Dewamê qiseykerdişê xo de Nasir Yagizî bale ante serê xoverdayîş vat, têkoşîn û xoverdayîşê înan do qetî ser bikewo û va: “Tek rayîrêk verê ma xoverdayîş û têkoşîn o. Teyna seba şarê Kurdî ney, ganî heme dostê şarê Kurdî zî vengê têkoşînî vera tecrîdî de berz bikerê. Çunke tek rayîrêkê çareserîya persa Rojakewtena Mîyanêne nika Îmraliyî de yo. Coka ma hîna bi xurtî têkoşîn û xoverdayîşê xo gird bikerê.”
Vera bêvengîye vengdayîş
Yagizî vengdayîş bi sazgehanê mîyanneteweyî rê kerd û va: “Dewletê ke vanê ê heqanê merdiman pawenê, vera tecrîd û grevê vêşanîye kerr û lal ê. Eke na bêvengîye heta nika dewam kena, babete tecrîdî de na şima kena hemparê dewleta Tirk a faşîste. Şarê Kurdî bi taybetî zî ciwanê Kurdî ganî naye qebûl nêkerê, vera naye xo ver ro bidê. Vengdayîş bi sazgehanê sîvîlan ê cimatî zî kena ke bêveng nêmanê.”
Nasir Yagizî peynîya qiseykerdişê xo de da zanayene ke, bi yewîyêka xurte û pîya do ser bikewê û tecrîdî bişiknê. HEWLÊR
