KCD’ê nerazîbûneke tund nîşanî desteserkirina şaredariyan da û bang li raya giştî kir ku helwestê nîşan bide. DBP’ê jî destnîşan kir ku desteserkirina şaredariyan ‘şerekî nû ye li dijî gelê kurd’ û ev tişt got: “Wê nikaribin bi vî rengî me rawestînin, em ê qeyûm nas nekin.”
Kongreya Civaka Demokratîk (KCD) der barê desteserkirina Şaredariyên Bajarên Mezin ên Amed, Wan û Mêrdînê daxuyaniyeke nivîskî weşand.
Di daxuyaniyê de hate ragihandin ku tayînkirina qeyûman li şaredariyan darbeyeke nû ya siyasî ye, helwesteke dijminane ye. KCD’ê bi berdewamî wiha got: “Wezareta Karên Hundir navenda darbeyê ye, tetîkkêşê kiryar û biryarên li dijî demokrasiyê ye, navenda provokasyon û desteserkirina azadî û mafane. Ev desthilatdariyê û Wezareta Karên Hundir tehemûl nekirine ku karên nelirê yên dema bihurî ya qeyûman, rezîltiyên qeyûman ên li dijî çavkaniyên gel kirin aşkere bibin. Bi qasî serê derziyê meşrûiyeta demokratîk a vê desthilatdariyê nemaye. Xespkirina îradeya gel, tişta di sindoqan de bi dest nexistine bixwazin bi dek û dolab û şîddeta dewletê bi dest bixin, bûye tiştekî asayî ya tifaqa AKP û MHP’ê.”
KCD’ê her wiha ev tişt anî ziman: “Wê gelê me tu carî van tiştan qebûl neke. Wekî berê wê xwedî li îrade, nûnerên xwe yên hilbijartine û wê xwedî li partiya xwe derkeve. Li hemberî vê desthilatdariyê bikaranîna rêyên demokratîk ên meşrû û demokratîk, mafekî destûra bingehîn û ya hiqûqa navneteweyîye. Bi têkoşîna hevpar û bi biryar a hêzên demokrasiyê em dikarin demokrasiyê bi dest bixin. Em bang li hemû kesan dikin ên ku di 31’ê adarê û 23’ê hezîranê de dengê xwe dane û ji bo têkçûna tifaqa AKP û MHP’ê û ji bo serketina demokrasiyê xebitîne. Ev ne bi tenê kêşeya HDP û gelê kurd e, ev kêşeya hevpar a hemû gelên Tirkiyeyê û hêzên demokrasiyê ye. Bêdeng nemînin, bedengî tê wateya pesendkirinê.”
DBP: Wê fêhm bikin ku nikarin bi me
Partiya Herêman a Demokratîk (DBP), der barê desteserkirina Şaredariyên Bajarên Mezin ên Amed, Wan û Mêrdînê û destgîrkirina bi sedan kesî daxuyaniyeke nivîskî weşand.
DBP’ê diyar kir ku endama wan a Desteya Rêveberiya Navendî Sevîm Adsoy, endamên wan ên Meclîsa Partiyê Tahîr Ozdemîr û Sûat Aslan jî di nav de bi dehan rêveberên partiyê û bi sedan siyasetmedarên kurd bi darbeya siyasî ya AKP û MHP’ê bi rengekî nehiqûqî hatine destgîrkirin. DBP’ê destgeserkirina şaredariyên bajarên mezin ên Amed, Wan û Mêrdînê weke şerekî nû yê li dijî têkoşîna demokrasiyê ya gelê Kurd pênase kir.
‘Wê nikaribin bi vî rengî me rawestînin’
Di daxuyaniya DBP’ê de hate gotin: “Armanca van operasyonên li dijî HDP’ê ku partiya me jî pêkhateyeke wê ye, tasfiyekirina siyaseta kurd e. Bi destgîrkirin û girtina me, bi operasyonên qirkirina siyasî yên ku ji wan heye wê me asteng bikin, wê fêhm bikin ku wê nikaribin baweriya gelan a bi azadî, ked, aştî û demokrasiyê bi dawî bikin. Em careke din destnîşan dikin; em ê qeyûman nas nekin, qebûl nekin. Divê hikumet tavilê ji vê gava xwe ya tirsnak vegere.”AMED
