30 temmuze de Anqara de bi hawayêkê hemwextî hêrişê Cemxaneyê Ana Fatma, Şahê Merdan, Komeleya Dewa Gokçebali û Weqfa Elewîyanê Bektaşîyan a Terekeme ame kerdene. Masaya Elewîyan a HDPyî ra Sevgî Kişin Sazan ard ziwan ke nê hêrişî tesaduf nîyê û vat tewirê ci bibedilîyo zî hêrişê vera elewîyan tim dewam kenê.
Endama Masaya Elewîyan a Komîsyonê Şaran û Bawerîyan a Partîya Demokratîke ya Şaran (HDP) Sevgî Kişin Sazane derheqê hêrişê dezgehanê elewîyan ê Anaqara de ANFyî rê qisey kerd.
Sazane seba ke hêrişî bi hewayêkê hemwextî roja verên a MuharRemî de ameyî kerdene no sey mesajêkê hesiban û vat: ”Ma zanayêne ke ê vanê hêrişkar gej o. Gama ke xebera hêrişî ameyî ez sey îdarekarêka Cemxaneyê Ana Fatma şîya warê qewimîyayîşî. Çîyo ka verî bale ma ante kerrayanê ke berî şikitbî, mermer bî û kerrayê ê dormeyî nêbî. Hêrişkarî amadekerde ameybî. A roje planêkê ma zî bibi. Roja verên a Muharremî de ma waştêne cem bikerê. Seba ke Pîrê ma nêweş kewt ma cem îptal kerdbi. Yanî îhtîmalo pîlo ke no yew provokasyon bi. Kerreyê ke erzîyayî wirdî nîyê. Eke biginayî kesî rê eşkayêne birîndar bîkerê.”
Sazane dîyar kerde ke yeno waştiş ke nê hêrişî bierzî milê rêxistinanê çepgiran ser û vat: ”Kesê ke vanê ameyê tepiştene nameyanê sey Bawer, Canî şuxulnenê. Kenê ke bi nê nameyê hêrişî bierzê milê rêxistinanê çegîran ser. Rêxistinêka çepgîr qey hêrişê cemxaneyêkî kena ke. Tirkîya mîyanê krîzê girdî de ya. Krîzo ekonomîk, krîzo sîyasî, demê vîjnayîşî, dengeyê ke Rojhelatê Mîyanênî de newe benê. Kesê ke tay hesabê ci est ê elewîyan ser ra yew kayî kay kenê.”
Sazane vist vîrî ke elewîyî tarîxî ra nata tim raştê qikerdiş û asîmîlasyonî yenê û vat: ”Wextê Osmanîyan de elewîyî pê kalmeyî ameyî kiştene ke ma tîra vanê mergo sûr. Demê komere de tewirê mergî zêdîyayî. Mergo sipî, yanî asîmîlasyon zî ame. Xopawitişê ma pîya têgêrayîşê ma yo. Ma tim şîdetî ra dûrî vindenê. Ma şertanê zehmet de Cemxaneyanê xo payra verdene. Badê hêrişî şar yeno beno endam, paştî dano. No hêz dano ma û ma payra verdeno. Elewîyî tarîxî ra vera zulmî çok nêdanê û wayîrê bawerîya xo vejîyenê. No zî mojeneno ke elewîyî senî xoverdayox ê.” ANQARA
