Qezaya Sulogluyî ya Edîrne de Çetîn Dogano ke Fermandarîya Tugayî de leşkerîye keno seba ke vat ”Werrekna ma perwerdeyê kurdkî bigirewtêne” di leşkeran sereyê ci de çeke parçe kerde.
Serebût 15ê tebaxe de qewimîya. Çetînî seba ke kurdkî qisey kerdêne û kurdkî pawitêne bi hedefê hêrişan. Hêrişî ra dima bedenê Çetînî de xeylêk rêçê xeylêk derbaz virazîyayî. Çetîn wedarîya nêweşxane û 3 rojan tedawî dî. Çetînî dima ke taburcu bi gêra Mêrdîn û gerreyê serebûtî kerd.
Çetînî Ajansê Mezopotamya rê wina qala hêrişî kerde: ”Leşkeranê hêrişkeran venga mi da. Ma derheqê kurdan de qisey kerd. Mi vat werrekna ma kurdkî perwerde bigirewtêne. Awirê leşkeran vurîyayî. Dima înan reyna venga mi da û ez berda kişta laye. Uca de mi rê vat ‘ti do hesabê şehîdan bidî’ û pê çeke daye rîyê mi ro. Pirnikê ma şikîya. Wexto ke ez ginaya erdî ro înan reyna ez derb kerda. No hêriş plankerde yo. Dima ke ez nêweşxane ra agêra leşkerîye fermandar A.A. mi rê vat ke ez terorîst a. Mi destûr girewt û ez uca ra vejîyaya. Ne bîlet dayo mi ne zî kesêk. Ez bi ê halê xo têna ameya. La ez do reyna şora uca. Asayîşê canê mi çin o, psîkolojîya mi xirab a. Na nîjadperestî ya.” MÊRDÎN
