Fermandarîya Merkezî ya YJA-Starî bi wesîleya serrgêra Qirkerdişê Parisî yê 9ê Çeleyê 2013î bi eşkerayîyêke Sakîn Cansiz (Sara), Fîdan Dogan (Rojbîn) û Leyla Şaylemez (Ronahî) yad kerdî.
Eşkerayîye wina ya:
”Serrgêra 11. ya Qirkerdişê Parisî de ma ronayoxanê partîya ma û fermandara serkêşe embaze Sara, şerwananê têgêrayîşê cinîyan Rojbîne û Ronahî bi minet û rêzî yad kenê. Ma sozê xo dibare kenê ke ala înan a têkoşînî biresnê serkewtişî.
Têgêrayîşê ma yê azadîye ni paradîgmaya azadîgîrîya cinîyan a Rayber Apoyî cinîyan ê kurdan û dinya rê bîyo hêvî. Rayber Apoyo ke vera ferasetê serdestîya camêrdan hemleya azadîya cinîyan dabî destpêkerdene ewro raştê hêrişanê hegemonan yeno. Rixmê ney zî PKK serkêşîya xoverdayîşê cinîyan keno; çunke têgêrayîşê ma sey embaze Sara xo bi tecrubeyanê cinîyan ê xoverdayoxan û têkoşeran weye keno. Embaze Sara destpêkî ra heta peynî hetê Rayber Apoyî de têkoşîn kerd û bîye fermandara cinîye ya verêne. Artêşa ma ya cinîyan zî bi kede û xîretanê aye û embazanê ma yê cinîyan ronîyaye. Ewro na artêşa ma seba pêro cinîyanê dinya hêvî ya.
Bêguman no rayîrê têkoşînê azadîye yê cinîyan sayê ked û xîretanê Rayber Apoyî û şehîdanê ma yê sey embaze Sara ra ame afernayene. Bawerîya embaze Sara ya bi na dewa seba ma pêroyînan destkewteyêko pîl o. Ma şexsê embaze Sara de musayî ke xo bibê, têkoşîn bikerê û xo ver bidê. Ewro têkoşînê ma nê esasî ser o koyan de dewam keno. Teqîbkerê embaze Sara bêtersî şinê serê dişmenî. Şerwanê YJA-Starî hol zanenê ke asta xo ya nikayêne û destkewteyê xo kamî ra deyn girewtê. Hêzê YJA-Starî sey embaze Sara ewnîyenê cuye ra, sey Sara vera dişmenî şer kenê, sey Sara dişmenî aciz kenê û tira hesab persenê. Şexsê Sarayan de ma do şerê xo yê azadîye ser bivisnê, ferasetê serdestîya camêrdan ra hesab bipersê.
Pêro cinîyê dinya têkoşînê Sara sey têkoşînê xo vînenê. Seke Rayber Apoyî vatbi azadîya komelî bi azadîya cinîyan bena ke na raştîye şexsê embaze Sara de ameya dîyene. Nê esasî ser o ma qerardar ê ke têkoşînê xo yê cinîya azade şexsê embaze Sara de biresnê asta tewr pîle û pêro dinya.
Têkoşînê cinîya azade ya ke bi Sarayan dest pêkerdo serkêşîya fermandaranê ma yê sey Leyla, Axîn, Hêjar, Ardem, Doga, Havîn, Jîndaran resayo asta tewr berze. Tewirê vera hêrişanê dewleta tirke ya îşxalkere sey xoverdayîşê embaze Sara erkê pêro gerîlayanê YJA-Starî yo. Çunke embaze Sara yena manaya şerî, hêrişê vera dişmenî û bawerîye.
Ma sey hêzanê YJA-Starî soz danê ke serra 2024î de têkoşînê şehîdanê ma yê sey Evîn, Sêvê, Fatma, Pakîzeyan ser bivisnê. Ma sozê xo dibare kenê ke ala Sara, Rojbîne û Ronahîyan biresnê serkewtişî û hesabê pêro qirkerdişan dewleta tirke ra bipersê.”
