Têgêrayîşê Cinîyan ê Kurdan ê Almanya (YJK-E) bi eşkerayîya nuştekîye da eşnawitene ke sey her serre do emser zî kurdî, enternasyonalîstî, dezeh û sagehê demokratîkî yê Almanya do vera qedexeyê serê PKKyî bêrê têhet û semedê tewrbîyayîşê çalkîye veng da.
“Eşkerayîye de nê ameyî vatene: Bi qedexeyê serê PKKyî reyna ame vînayene ke eke babete bibê kurdî Almanya senî heqanê merdiman binpay kena. Têkoşînê m ayê estbîyayîşî yê 50 serran de şarê ma tim raştê polîtîkayanê qirkerdiş, asîmîle û şerî yeno. Almanya bi nê qerarî hem sûcanê şerî yê Tirkîya nêvînayîşî ra yena hem zî goreyê xo sey xançerê demokrasîyî şuxulnena. Kurdê ke mecbur manenê ke Almanya de biciwîyê rîyê falîyetanê sîyasîyan ra raştê cezayan yenê. Keye û cayê karî yenê sereştene, îşkence, ajankerdiş, tepiştiş raştê xeylêk caardişanê xiraban yenê. Kenê ke têkoşînê şarê kurdî xirav ramojnê û verê waştişê şarî yê cuyeya azade bîgêrê. Ganî Almanya hinî vera kurdan polîtîkayanê çareserî yê haştîye bifîno dewre.
Rayraşîyayîşo ke do 18ê teşrîna peyêne de Berlin de bêro kerdene vera nê zîhnîyetê qedexekerdişî yeno manaya cigêrayîşê heqêkê demokratîkî yê şarê kurdî. Eynî wextî de verê zîyaretê Erdoganê faşîstî yê Almanya mo zî ganî bêro vatene: Qerarê ka pêyê beranê qefilnayan de serê ma ra yenê girewtene, ma înan nas nêkenê û ma do vera heme zextanê serê xo heqanê xo yê demokratîkan bişuxulnê. Na çarçewa de ma veng danê heme kurdan û dostanê înan ke vera nê zîhnîyetê qedexeyî yê 30 serran yo ke ma kurdan kriminalize keno 18ê teşrîna peyêne de Berlin de vengê xo berz bikerê.”
