Navenda Nûçeyan |
Fermandariya Yekîneyên Parastina Rojhilatê Kurdistanê (YRK) bi daxuyaniyeke nivîskî ragihand ku dewleta dagirker a Îranê di 18’ê hezîranê de ji bajarên Sine û Hemedan hêzeke zêde aniye herêmên girêdayî Merîwan û Dîwandere.
Hêzên Îranê xwe li dibistan û mizgeftên gundên li herêmê yên weke Tewekulan, Agce, Gogce, Nergiselle, Qemçiyan, Deregawan, Kanî Temrxan û Şaqella bi cih kiriye û her wiha gelek baregehên seyar ên leşkerî ava kirine û ji bo gel qedexeya derketina derve ragihandine.
Li herêmên Çilçeme, Dûbra û Sultanê jî bi zorê dewar û pezê gel ji zozanan dûr xistine û dest bi operasyonê kirine.
Li gorî daxuyaniyê şeva 22’yê hezîranê ji saet 1’ê heta 5’ê berbangê balafirên keşfê yên hêzên Îranê li ser herêma Merîwan a li ser çiyayê Sultan û li Dîwandereyê li çiyayê Dûbrayê geriyane.
Fermandariya YRK’ê diyar kir ku serê sibeya heman rojê bi hewan, tank, katuşa û kobrayan herêm bi qasî du saetan hatin bombebarankirin û da zanîn ku paşê jî li gundê Gogce dest di operasyonek berfireh kirine û hêzên xwe li ser Dûbra û girên Derûberê bi cih kiriye.
Operasyona li herêmê hîne dewam dike û fermandariya YRK’ê da zanî ku dê di derbarê operasyonê de paşê agahiyên berfireh bi raya giştî re parve bikin.
