HDP’ê li Navçeya Melezgîrtê ya Mûşê ku AKP bi 3 dengan bi ser ket û 432 deng jî nehatin hesibandin, îtîraz kiribû. Lijneya Hilbijartinê ya Bajar îtîraza HDP’ê red kir. Hevseroka Giştî ya HDP’ê Pervîn Buldan, têkildarî geşedanan hat bajêr
Lijneya Hilbijartinê ya Mûşê li navçeya Melezgîrtê ya Mûşê îtîraza HDP’ê ya hilbijartinê red kir. HDP ku li navçeyê 2 hezar û 500 deng li pêş bû, xwest deng ji nûve bên jimartin û li Lijneya Hilbijartinê îtîraz kir. Li gorî daneyên ne fermî tifaqa Cumhur 15 hezar û 919 deng, HDP’ê jî 15 hezar û 381 deng deng stend. HDP’ê ji bo 103 sindoqan 2 hezar û 500 dengan îtîraz kir. Lijneya Hilbijartine ya Bajêr îtiraza HDP’ê red kir. Di hilbijartina li Navçeya Melezgîrtê HDP’ê 3 hezar û 638, AKP’ê jî 3 hezar û 641 deng stend. Li navçeyê 9 hezar û 591 hilbijêr çûn ser sindoqê. 432 deng nehatin hesibandin. HDP ji ber ku di navbera wê û AKP’ê de 3 deng hebû dîsa îtîraz kir. HDP xwest 432 dengên nehatine qebûlkirin ji nûve bên jimartin. Lijneya Hilbijartinê îtiraz red kir
Li aliyê din hêj encama fermî ya hilbijartinê diyar nebû, Waliyê Mûşê Îlker Gunduzoz bêyî ku encama fermî bê aşkerekirin Namzetê AKP’ê Feyat Asya ziyaret kir û pîroz kir. Li aliyê din Walîtiya Mûşê piştî îtîraza HDP’ê heta 15 rojin hemû cureyên çalakiyan qedexe kir. Li ser van geşedanan Hevseroka HDP’ê Pervîn Buldan, Parlamentera HDP’ê Huda Kaya û Garo Paylan hatin Mûşê. MÛŞ
