Hemsereka Pêroyî ya Verêne ya HDPyî ya verêne ya tepişte Fîgen Yuksekdage va: “Pê tepiştişê ma qîm nêkenê, ma di rey tepiştî. Ez 22 reyî bêra tepiştene zî do raştî nêro vurnayene.”
Roniştişê 15ine yê dewaya Hemsereka Pêroyî ya Verêne ya Partîya Demokratîke ya Şaran (HDP) Fîgen Yuksekdage, 16. Mehkemeya Cezaya Giran ya Anqara de ke ewro yena dîyene dest pêkerde. Hemserekê Pêroyî yê HDPyî Sezaî Temellî, komêka pîle û HDPyîjî û dadîya Yuksekdage Munîre Yuksekdage tewrê mehkeme bîyî.
Salona mehkeme de tedbîrê asayîşî zêde ameyî girewtene. Zafê avûkatan dewa taqîb kerde. Yuksekdage dest pê pawitişê xo kerd û da zanayene ke pwaitişê xo ra verî wazena vaja ke a selametîye pêro şarê Stenbolî ra wazena û a hêvî kena ke do afatêka xirabêre nêra meydan.
‘Rezîlîya sîyasî qewimîyaye’
Yuksekdage dewamê pawitişê xo de wina va: “Rezîlîya sîyasî qewimîyaye. Dewaya ke ez tira tepişîya ya reya diyîne ameye dîyene. Nêmeya cuya ma hepis de odeya SEGBÎSî de derbas bena. Ma texmîn kerd ke na roje zî do çîyêk nêro qewimîyene. Çunke zindan de rewşêka yewnaqeyde estbî. Prensîbê huqûqa bingeyî ameyî binpaykerdene.
‘Dozger zî zanayêne na bêhuqûqî ya’
Dosyaya dewa ameye mi verî. Mi ard înan vîrî ke no muhakemekerdişo heman o. Dozgerî vat ke o zî zano. Her çiqas ma vat ke prosesê persayîşî goreyê huqûqî nîyo zî dozgerî bi israr ma ra îfade girewte. Ma fam kerd ke na rewşe qerarê dozgerî nîya. Operasyon nişka ra bi. Hetê bînî ra çîyeko tewr rezîl no yo; dozger hewce nêkerd ke vaje mi sewq keno ke ez bêra tepiştene zî. Mi no sewqê seba tepiştişî televîzyonî de dî.
‘Rastîye do nêra vurnayene’
Ma vejîyayê verê dozgerî. Mehkemaya Cezaya Sulhî mojnayo ke senî xebitîyenê. Îqtîdar tewr zaf mudaxeleyê dadgehan û dadgeran keno. Seba ke ez hurmetê şarî ke rayî dayî mi kena ez vejîya tîya û qisey kena. Çîyêko eşkera bîyo beyan. Înan qerarê tepiştişî yê ma da. Ez seke dewaya heman ra cara diyîne ameye tepiştene, vejîyaya şima verî. Tepiştişêk qîm nêkerd, ez di reyî ameya tepiştene. Vatişê mi û fikrê mi do estbîyayîşê HDPyî û girîngîya HDPyî bivurnê? Ney. Ê mi 22 reyî zî bitepişê, na rastîye do nêra vurnayene.”
Yuksekdage rê cezaya 83 serran yena waştene
Çarçeweya dosyayêk a 92 rîpelî ra yena meydan de 30 serran ra heta 83 serran Yuksekdage ra cezaya zindanî yena waştene. Yena waştene ke Yuksekdage bi nameyê ‘Îdarekarîya Rêxistine’ bêra cezakerdene. STENBOL
