Hemsereka Pêroyî ya HDPyî ya verêne Fîgen Yuksekdage hepisxane ra bi telefonî beşdarê Heyetê pêroyî yê HDKyî bîye. Yuksekdage va: “Ma do miheqeq ser bikewê, xoverdayoxî do ser bikewê.”
Hemsereka Pêroyî ya HDPyî ya verêne Fîgen Yuksekdage ya ke Hepisxaneyê Kandira de sey rehîne yena girewtene bi telefonî beşdarê Konferansê Heyetê pêroyî yê 9ine ê HDKyî bîye.
Fîgen Yuksekdage silamê xo şawitî û nê vatî: ‘‘ Ez hêvî kena ke wa konferans baş derbaz bibo û prosesê verê ma de rayîrêko baş abikero. Ma xoverdayoxê haştîye ya demokratîke wazenîme ke wezîfeyanê xo bîyame ca. Ma zere de, şima teber de. Ez hêvî kena ke rayîrvanê nê rayîrî do ser bikewê. Vizêrî ra heta ewro, tarîxê merdimîye de, kesê ke hetê ked û azadîye bîyê, bîyê serkewte. Ma cayê wezîfeyê xo yê mucburîyî de yê, la tîya zî cayê wezîfeyê ma yo. Ma hevalîya xo û şima xo vîrî ra nêkerda. Ma bi ked û ruhê xo merkezê no mucadeleyî de yê û zerrîya ma pîya erzena. Ez wazena reyna bivaja ke HDK hêzê ma ya esasî yo û rêxistina bindestan a. Her çiqas ha zere, ha teber de, rayîrê ma de engelî bêrê ronayêne zî ganî ma no hêzê xo hîna bikê xurt.”
Yuksekdage bale ante xoverdayîşê Leyla Guvene û wina va: ‘‘ Leyla Guvena hêcaye xeylî wexto ke grevê vêşanîye de ya. Seba ke tecrît bêro wedartene, bi xoverdayîşêko xurt xoverdana. Pêroyê girewteyê zindananê ke azadîye wazenê, kesê ke qetîya esîr nêbîyê, seba ke berî abikerê bîyê yew. Kewtê rayîrêko bizehmet la peynîya ney rayîrî de do qezenc bikerê. Ez bawer kena, pêroyê şarê Tirkîya girewteyan rê wayîr vejînê û înan teyna nêverdanê. Bi no qeyde ma Tirkîya de rayîrê haştî û azadîye akenê. Bi na bawerîye şima pêroyînan silam kena. Ez şima ra hes kena,şima pêroyînan ra hes kena!”
Peynîya qiseykerdişî de beşdarvananê Heyetê Pêroyî bi slogana ”, “Biciwîyo Xoverdayîşê Zîndanan” Yuksekdage silam kerde. ANQARA
