Têgêrayîşê Cinîyan ê Azadan (TJA) Mêrdîn de startê çalakîyanê xo yê seba 25ê Teşrîna Peyêne, 17ê teşrîna peyêne de Qoser de dabî.
Hemsereka HDPyî ya qezaya Kerboranî ya Mêrdînî Yuksel Oguze derheqê amadekarîyanê înan ê seba 25ê Teşrîna Peyêne Roja Têkoşînê Vera Şîdetê Serê Cinîyan de ANFyî rê qisey kerd.
Yuksel Oguze bale ante tedayanê dewlete yê vera cinîyan ê kurdan ser û vat: ”Tim verê bînaya ma de wesayîtê polîsan est ê. Polîsî her kombîyayîş, zîyaretanê ma û pêvînayîşanê ma teqîb kenê. Polîtîkayê teda û şîdetî bi taybetî vera cinîyan yenê caardene. Prosesê xoverdayîşê xoîdarekerdişî ra dima bi taybetî tedayî zêdîyayî. Dewlete hêzê cinîyan ê rêxistinbîyayeyî ra tersena. Bi taybetî cinîyê ciwanî hedefê polîtîkayanê şerê taybetî de yê. Ma do vera nînan çalakîyanê 25ê Teşrîna Peyêne de heta ma ra bêro xo biresnê cinîyan ê ciwanan û înan tewrê têkoşînê rêxistinbîyayeyî bikerê.”
Oguze da zanayene ke Kerboran de şuxilnayîşê madeyanê narkotîkî zêdîyayo û ê bi taybetî vera ney kombîyayîşan kenê. Yuksele vat: ”Çarçewa polîtîkaya şerê taybetî de şuxilnayîşê madeyanê narkotîkî yeno vilakerdene. Hetê bînî ra rêxistinê sey TUGVA binê nameyê têkoşînê vera narkotîkî de xo resnenê cinîyan ê ciwanan û nînan ancenê xo kişte. Ma vera nê xîretan zî kargehan do virazê.”
Yuksele Oguz pê hesna ke qeyûmî Mêrdîn û qezayanê ci de hêrişê destkewte û dezgehanê cinîyan kenê. Yuksele vat: ”25ê Teşrîna Peyêne ra dima heta weçînayîşanê herêmîyan têkoşînê cinîyan ma do berz bikerê, weçînayîşan de ser bikewê û cinîyî ancî do îdareyanê herêmîyan de cabigêrê.”
