Zarokên Serêkaniyê yên ku ji ber êrîşên dewleta tirk û çeteyên wê koçber bûn, li Hesekê tevî malbatên xwe tev li çalakiyê dibin. Zarokên ku piştî çalakiyê dilîzin û distrên, di lîstik û stranên xwe de jî hêviya xwe ya vegera dibistan û malên xwe tînin ziman
Ji ber êrîşên qirkirinê yên dewleta tirk a dagirker bi sedhezaran welatî ji herêmên Serêkaniyê û Gire Spî koçber bûn. Di êrîşê de zêdetirî 245 sivîl hatin qetilkirin û zêdetirî hezar kes bi çekên kîmyewî û qedexekirî hatin birîndarkirin. Welatiyên ku koçberî herêmên biewle bûn, jiyana wan bêserûber bûye û zarok ji hemû mafên xwe bêpar mane.
Gelemperiya koçberên Serêkaniyê derbasî Hesekê bûne. Şêniyên Serêkaniyê ji bo şermezarkirina êrîşên dewleta tirk û çeteyên wê ji 28’ê cotmehê ve li Parka Arî ya Qamişloyê ya ku li pêşiya Komîseriya Penaberan a Neteweyên Yekbûyî (NY) di çalakiyê de ne. Çalakiya welatiyan kete roja 10’emîn.
Di çalakiyê de her wiha bi dehan zarok jî tevî malbatên xwe tev li dibin. Çalakvanên ku serê sibehê saet di 11:00’an de li cihê çalakiyê kom dibin, êlekên spî yên ku li ser nivîsên ‘Serêkaniyê dîrok e’, ‘Na ji qirkirinê re’ û ‘Na ji dewleta tirk a dagirker re’ hene li xwe dikin.
Piştî çalakiyê jî zarok ji xwe re li parkê dilîzin. Zarok stranan dibêjin û lîstikên cur bi cur dilîzin. Lê tevî vê yekê jî li ser rûyê hemûyan nîşaneyên xemgîniyê heye. Zarok di stran û lîstikên xwe de jî hestên xwe yên bêrîkirinê mal û dibistanên xwe tînin ziman. HESEKÊ
