Navenda Nûçeyan
Seroka Dewletê û ya Partiya Karker Jacinda Ardern ragihand ku ew ê hefteya bê roja çarşemê rewşa awarte ya avhewayê ragihînin.
Adern da zanîn ku ew ê hefteya bê roja çarşemê biryarê ragihînin, di daxuyaniya ku di televizyona dewletê TVNZ’yê de diyar kir ku, “ Me guhertina avhewayê her tim ji bo herêma xwe wek metirsiyek mezin dîtiye loma divê em tavilê ji bo vê biryarê bikevin nav livûtevgerê.”
Astengî ji holê rabûn
Hikumeta Partiya Karker ev sê sal e bi Partiya Kesk û Partiya populîst ya Fîrst Zellanda ya Nû re koalîsyonê dike. Dema Adern di sala 2017’an de nû hatibû hilbijartin ji Partiya Kesk James Shaw wek Wezîrê Avhewayê tayîn kiribû.
Hikumeta koalisyonê ji bo sala 2050’yan biryara hedefa sifir karbonê tevlî qanûnan kiribû û komîsyona serbixwe ya avhewayê saz kiribû. Zellandaya Nû rê li ber hin polîtîkayên kesk ên mîna pêşniyarkirina bacên ji bo otomobîlên bi sotemeniya bi fosîl a îthal, pakêtên alîkariyê yên ji bo wesayîtên bi ceryan û ragihandina rewşa awarte ya avhewayê hatibû girtin.
Peymana hevkariyê
Lê piştî ku Partiya Karker tena serê xwe bû îqtidar tu astengî li ber wan nema. Her çend ku partî tena serê xwe îqtîdar be jî lê bi Partiya Kesk re li ser peymana hevkariyê li hev kirine.
Tevlî welatên din dibe
Adern di daxuyaniya xwe ya di televizyonê de wiha got: “Mixabin me di parlamentoya serdema dawî de derbarê rewşa awarte ya avhewayê de tu pêşniyazname pêş nexistiye, lê niha em dikarin bikin.”
Heke Hikumeta Zellandaya Nû rewşa awarte ya avhewayê ragihîne, ew ê tevlî welatên mîna Kanada,Fransa,Qraliyeta Yekbûyî û Japonyayê bibe ku ev welat jî ji bo têkoşîna bi guherîna avhewayê re li ser heman riyê ne.
Ligel ku tu aleqeya ragihandina rewşa awarte bi hevgirêdana welatan tune ye lê ev biryar van welatan li ser heman armancê digihîne hev.
