Navenda Nûçeyan |
Tora Mafên Mirovan a Kurdistanê (TMMK) da zanîn ku girtiya siyasî Zeyneb Celaliyan li Girtîgeha Qerçekê bi vîrûsa koronayê ketiye. Têkildarî mijarê bavê Celaliyan, Elî Celaliyan ji TMMK’ê re axivî.
Celaliyan diyar kir ku duh keça wî bi rêya telefonê ji wan re gotiye ku ew tevî çend girtiyên din ên bi şewba koronayê ketine, xistine odeyeke cuda ya beşa karantînayê ya girtîgehê û hê jî ta û bêhntengiya wê ya dijwar didome. Celaliyan wiha dom kir: “Bijîşkê girtîgehê ji wê re gotiye ku vîrûsê hemû pişka wê girtiye û hewl didin ku bi dermanan îltîhaba pişka wê kontrol bikin. Dixwazim ku di zûtirin dem de keça min veguhezînin nexweşxaneyekî ji derveyî girtîgehê.”
Hêjayê bi bîr xistinê ye ku di 29’ê nîsanê de hêzên ewlekariya rejîmê ji nişkan ve Celaliyan ji girtîgeha Xoyê veguhestibûn Girtîgeha Qerçekê û ji wê demê ve niha di beşa qarantînayê girtîgehê de tê ragirtin. Bavê Celaliyan da zanîn ku hefteya bihûrî ji TMMK’ê re ragihandibû der barê keça wî de li şaxa 10’an a Dadgeha Cezayî ya Tehranê dozeke nû hatiye vekirin. Zeyneb Celaliyan jî diyar kiribû ku agahiya wê ji sedemê vekirina dozê nîne.
