Navenda Nûçeyan |
Komîteya Ziman, Çand û Perwerdeyê ya KNK’ê 15’ê Gulanê Roja Zimanê Kurdî pîroz kir û bang li her kesê kir ku ji bo perwerdehiya zimanê kurdî bibe perwerdeyeke fermî divê serî de sazî û hemû partî li gel her welatiyeke kurd bi berpirsyar tevbigerin û ji bo vê aramancê jî pêwîst e kurd li Kurdistanê bi vê hewlê têkoşîna xwe xurtir û bilind bike.
Peyama KNK’ê ya ziman wiha ye:
“15’ê Gulanê Cejna Zimanê Kurdî ye. Îsal di nav rewşeke taybet da ev cejn tê pîrozkirin. Dewletên Tirkiye, Îran û Sûriyeyê zilma xwe ya li ser netewa kurdan sist nekiriye û naxwazin sist bikin, kurd û Kurdistanî jî ji bo bi destxistina mafên xwe yên bingehîn li dijî van dewletên dagirker berxwedana xwe didomînin.
Gelê kurd bi salan e ji bo domandina hebûna xwe têkoşîneke xurt dide. Di pêvajoya vê têkoşînê de çeperê zimanî her tim di serî de bûye.
Ji bo dagirker têkbirin û helandina gelê kurd bi birandina zimanê wan ve girêdaye, ji bo vê yekê girîng e ku kurd li ser pirsa perwerdeya kurdî rawestin û li ber xwe bidin. Zimanê me stêrka geş a li asîmanê welatê me ye, heke ev stêrk birije û nemîne tu wate ji hebûna kurdan re li ser vê erdnîgariyê jî namîne, bi vê ruhê û di van rojên teng de bi rê û rêbazên cuda divê em cejna zimanê şêrîn ê kurdî pîroz bikin û hişyarî û hişmendiya çand û ziman di nava gel de xurt bikin.
Pêwîst e rê li ber perwerdeya bi kurdî bê vekirin û ji bo vê yêkê di serî de partî û saziyên me û pey re jî her welatiyek kurd divê xwe berpirsiyar bibînin, ji bo vê armancê pêwîst e kurd li Kurdistanê bi hemû şiyanên xwe têkoşîna xwe xurtir û bilindtir bikin.
KNK di vî warî da tim bala hêzên neteweyî kişandiye û dikêşê ser vê pirsa jiyanî. Komîsyona Ziman û Perwerdeyê ya KNK’ ê bi vê bîr û hizirê, pîrozbahiyên Cejna Zimanê Kurdî yên îsal bi dirûşma ‘Ji bo kurd û Kurdistanê Parastina Zimanê Kurdî erkê neteweyî ye’ daye destpê kirin.”
