Endama Komîteya Zîndanan a PKK-PAJKî Rozerîn Ocalane derheqê çalakîya boykotî ya tepişteyan a vera tecrîdê Îmraliyî de ANFyî rê qisey kerd.
Rozerîne da zanayene ke çalakîya boykotî safhaya diyîne ya Hemleya ‘Abdullah Ocalanî rê Azadîye, Meseleya Kurdan rê Çareserîya Sîyasîye’ ya. Rozerîne vat: ”Embazê tepişteyî bi şîarê ‘Şert û mercanê cuya Rayberîye xo rê kenê esas’ nê boykotî kenê. Bi nê boykotî reya verêne zîndanan de na aste de çalakîyêka radîkale yena kerdene. Embazê ma nêşinê mehkemeyan, pêvînayîşan nêkenê. Na çalakîya ma vera faşîzmî cewabo tewr pîl o.”
Rozerîne pare kerd ke Rayberê Şarê Kurdî Abdullah Ocalan vera tecrîdê Îmraliyî îrade û qerardarîyêka pîle mojneno û vat: ”Merkezê xoverdayîşê ma zî Îmrali yo. Rayberê ma mîyanê tecrîdî de zî serkêşîya têkoşînê ma keno û bi nê hawayî hêzanê hegemonan rê vano ‘Şima se bikerê zî ez do îradeyê xo bimojna.’ Embazê ma yê zîndanan zî wazenê xeta raştîya Rayberîye de bi xoverdayîşê ey erk û meuldarîyanê xo bîyarê ca.”
Rozerîne dîyar kerd ke nê prosesî de çalakîya ‘Nobeta Edaletî’ yê dadî û merdimanê tepişteyan zaf girîng a û vat: ”Dormeyê çalakîyanê dadîyan de hîsgerîyêke ameye afernayene.”
Rozerîne vist vîrî ke faşşîzmê AKP-MHPyî weçînayîşan de derbêka pîle werda û vat: ”Tirkîya û Kurdîstan de atmosferêko psîkolojîk û mentalî ameyo afernayene. Ma venga pêro kesan danê ke bi nê ruhî dormeyê hemle de bêrê pêser. Wa her kes erk û mesuldarîyanê xo bîyaro ca, wayîrê xoverdayîşê Rayberîye û embazanê zîndanan vejîyo.”
