Zîndanê Tîpê Tyî yê Dîlokî de 3 tepişteyan seba wedartişê tecrîdê serê Rayberê Şarê Kurdî Abdullah Ocalanî dest bi grevê vêşanîye yê bêdem-bêagêrayîşî kerd. Zîndanê Meletî de zî 4 tepişteyî 25 rojî yo grevê vêşanîye de yê.
Grevê vêşanîye yê ke rayberîya hemseraka KCD‘yî û parlamentera HDP‘yî Leyla Guvene de semedê wedartişê tecrîdê serê Rayberê Şarê Kurdî Abdullah Ocalanî ameyî destpêkerdene, çend şino vila benî. Zîndanê Dîlokî de 3 tepişteyî bi nameyê Abdullah Kurt, Ugur Coşar û Şaban Yenerî dest bi grevê vêşanîye yê bêdem-bêagêrayîşî kerd.
Maya Abdullah Kurtî, Nazîfe Kurte ke ANF‘yî rê qisey kerd vat ke lajê aye telefon de dayo zanayene ke ey bi embazanê xo Ugur Coşar û Şaban Yenerî ya pîya 28‘ê Çile de dest bi grevê vêşanîyê yê bêdem-bêagêrayîşî kerdo. Hetê bînî ra Zîndanê Meletî de zî tepişteyê bi nameyê Mehmet Bilgîn Uguz, Mazlûm Dînç, Şemsettîn Aykaç û Sertaç Çelîk zî 25 rojî yo grevê vêşanîye yê bêdem-bêagêrayîşî de yê.
