Wekîla HEDEPî ya Mersînî Perîhan Koca dîyar kerd ke Zîndanê Tarsusî de astêka girane de heqê merdiman yenê binpaykerdene.
Perîhan Kocaya ke zîndan de tepişteyî zîyaret kerdo ANFyî rê qisey kerd.
Koca dîyar kerd ke zîndanan de her roje şert û mercî hîna zaf benê giran, muracatê tepişteyan yenê peygoşkerdene û vat: ”Tepişteyê Zîndanê Tarsusî raştê binpaykerdişanê heqanê merdiman yenê. Nê çaxî de ke Qanûno Bingeyî yeno betalkerdene, heqê merdiman ê bingeyînî yenê binpaykerdene.”
Koca bale ante meseleyanê pakîye, weşîye, werde û awa germe yê tepişteyan ser û vat: ”Tepişteyê sîyasîyî wexto ke vera kerdişanê xiraban vejîyenê gardîyanî heqaretê înan kenê, îşkenceyê înan kenê û cezaya dîsîplînî danê. Tepişteyî wazenê ke derheqê kerdişan de mudir de qisey bikerê la mudir qebul nêkeno.”
Koca da zanayene ke tepişteyî nasnameyê xo yê kurdayetîye ra raştê teda yenê û vat: ”Hewteyanê peyênan de gardîyanê bi nameyê Erenî tepişteyan rê bi kurdkî qiseykerdiş qedexe kerdo. Tepişteyan vat ke wexto ke ê mîyanê xo de bi kurdkî qisey kenê, cezaya dîsîplînî û hucreyî dîyena înan.” MERSÎN
