Şervanên HSDyî dewa Zîrgan û Til Temirî de derbê giranan danî çeteyê dewleta tirkî û komê çeteyan yê pabesteyê aye ro. Netîceyê pêkewtişan de 7 wesayîtê çeteyan û dozerêk ame teqanayene. Sewbîna xeylê çeteyî ameyî kiştene û birîndarkerdene
Hêrişê hêzê artêşa tirkî ya dagirkere û komê çeteyan yê pabesteyê aye yê vera rojawanê Kurdistanî dewam kenî. Na çerçewe de hêzê dagirkerî dewa Til Temirî û Zîrganî de hêrişanê şîdetinan pê ardî.
Ame zanayene ke şervanê Hêzê Sûrîyeya Demokratîke (HSD) vizêr dewanê Til Werd û Ingel Hawa yê pabesteyê Zîrganî de hêrişanê hêzê dagirkeran puç kerdî. Ame dîyarkerdene ke netîceyê şer û pêkewtişan de 3 wesayîtê çeteyan yê doçkabarkerde û 3 wesayîtê boydayîşî yê leşker û çeteyan ameyî teqnayene û çeteyê ke tedebîyî zî ameyî kiştene. Ame zanayene ke şer û pêkewtişan de xeylê dagirkerî ameyî kiştene, labelê hûmara înan nêameya zanayene.
Eynî wext de hêzê dagirkerî şewa verên hêrişê dewa Til Mihemedî ya girçdayeyê Zîrganî kerdî. Hêrişanê dagirkeran ra dima şervanê HSDyî cewabanê giranan dayî û çete mecbur mendî ke tepîya biancî. Netîceyê şer û pêkewtişan de wesayîtêk doçkabarkerde, 2 wesayîtê Toyota û wesayîtêk BMByî zî derb werdî. Şerê herême de tewr tay 15 çeteyê ameyî kiştene û xeylê çeteyî zî birîndar bîyî.
Komê çeteyan yê DAIŞ û El Nusrayî şewa verên hêrişê dewa Erbeginî ya Til Temirî kerdî. Hêrişanê dagirkeran ra dima şervanê HSDyî cewabanê giranan dayî çeteyan ro. Hûmara çeteyanê ke ameyî kiştene û birîndarkerdene nîna zanayene. HESEKÊ
