Roja verêne ya Muharemî de Anqara de tay cemxaneyî û Almanya de Merkezê Kulturê Elewîyan ê Dudenî raştê hêrişî ameybî. Erdoganî nê hêrişanê sîstematîkan ra dima cemxaneyêkê Mamakî yê Anqara zîyaret kerd. Zîyaret de dêsan ra resimê Hz. Alî wedarîyabî. Wekîlê HDPyî yê Antalya Kemal Bulbulî zîyaretê Erdoganî ANFyî rê ercna.
Bulbulî da zanayene ke tay kesan ‘meşrûtîya zîyaretî’ rexne kerdo. Bulbulî vera ney nêrazîbîyayîşê xo mojna û îfade kerd ke cemxaneyî cara meşrû yê. Bulbulî ard ziwan ke oyo ke meşrû nîyo wedarnayîşê resimanê Hz. Alîyî yo û vat: ”Cemxaneyî meşrû yê la qanûno bingeyî meşrû nîyo. Erdogan bi teda û ferzkerdişî, pê keyfê xo şi cemxane, eyar da merdiman û goreyê bawerîya elewîtîye tênêra; nê meşrû nîyê. No vera elewîyan sûc o. Ti hem goreyê keyfê xo şinî cayê bawerîya elewîtîye hem zî eyar danî ci. No nêzdîbîyayîşê Erdoganî goreyê Îslamî zî nîyo.”
Bulbulî vist vîrî ke Erdoganî zîyaret de derheqê hêrişanê vera elewîyan de qisey nêkerdo û vat: ”Erdoganî seba yew armancî no zîyaret kerd. Çi serekkomar çi padîşax çew nêeşkeno hîna rehet ê meqamî de ronişo. Kişta dedeyî de çi gureyê ey est o? O dede zî dedeyê kamyew ocaxî yo? O zî dede nîyo, beno ke înan o kes camî ra ardo. Tira vanê ‘dedeyê cemxaneyî’ la elewîtîye de çîyo winasên çin o. Dede û pîrî pabesteyê ocaxan ê. Cemxaneyan de wexto ke cem gêrîyeno çew nêeşkeno kişta pîr/dedeyî de ronişo. Serekkomar zî bibo ganî merdim verî wesfanê xo biterikno. Dima eşkeno meqam de ronişo. Reyna elewîyan de ‘akerdişê rojeyî’ çin o. Ma de kesê ke seba rojeyî nanê taybetî virazenê û tira vanê ‘fitar’ sey heramzadeyî pênase benê. Erdogan serî ra heta binî xelat têgêrayo. Xora nê camêrdî cemxaneyî rê ‘cumbuşxane’ vatbi, waştbi pê dozerî cemxaneyan birijno, seba veradîyayîşê kiştoxanê Qirkerdişê Madimakî zî vatbi ‘Xêrîn bo.’
Eke merdim biwazo Şînê Kerbelayî de psîkolojîya sûcdarîya Yezîtî ra bixeliso o çax cemxane adreso raşt o. Çunke ma de Yezîtîye yena manaya teda, zulm û ferzkerdişê xizanîye. Tirkîya nê hetî ra vurîyaya Kerbela. Erdogan ganî verî bêro dîwanê Şah Huseyîn-î Kerbelayî de vinderoo, merdimanê Tirkîya ra biperso vajo ‘Şima razî yê?’ Eke merdimî riza bidê o çax Erdogan eşkeno şoro cemxane. Nêbo nêeşkeno. Hende zelal û akerde yo.” STENBOL
