Kovarê mîzahê Zrîng ya mehane derdikeve di berga hejmara xwe ya vê mehê de cih da mijara ziman û bal kişand ser mijara nifşên nû ku bi kurdî fêm dikin lê nikarin biaxivin. Kovarê di bergê de tabloya bi navê ‘Qêrîn’ ya resamê binavûdeng Edvard Munch û got; ‘Kürtçe anlıyorum ama konuşamıyor’ (Kurdî fêm dikim lê nikarim biaxivim). Berga kovarê ji aliyê Rûşen Sarili ve hatiye çêkirin.
Di vê hejmarê de xêzkar Eşref Mumcu bi karakterên ‘Melle’, ‘Dîkê Qoqo’, ‘Sosretîk’, ‘Tabletên Beredayî’, ‘Evînên Sist’, ‘Mehlûqatên Eşref Mumcu’ û ‘Tirşik’ reng daye kovarê.
Zehra Dogan bi xêzên xwe bal kişandiye ser pirsgirêka aboriyê. Di vê hejmarê de kovarê cih daye xêzeke ji girtîgehê hatiye şandin ku ji aliye Hemed ve hatiye çêkirin û her wiha Metîn Mar jî ji girtîgeha Tîpa F ya Wanê nivîseke mîzahî ji kovarê re şandiye.
Di hejmara nû de Smaîl cara ewil ji bo Zrîngê xêz kir. Xezkarên din ên vê hejmarê ev kes in; Bunyamîn Karakoç, Erceren, Hebûn, Michael Erdman, Kubîlay Odabaş, Mehmet Erbey û Mustafa Yaman.
Nivîsên vê hejmarê
Her wiha Azat Kutî bi nivîsa ‘Meselokên Me’, Şêx Zûbêr bi nivîsa ‘Manîfesto’yê, Ikram Balekanî bi nivîsa ‘Kurd dibêjin Caş’ û Ozgur Amed bi nivîsa ‘Qûna tazî behrê dixwazî’, Mem Aliyê Kamûr bi nivîsa ‘Durûtî’ di hêjmarê de cih digirin. AMED
