Ame vatene ke koyê cemedî ê tewr gird ê dinya A68 helîyaye helîyaye û parçe parçe bîyo. Daîreya Cemedî ya Neteweyî ya Amerîka derheqê babete de eşkerayî da û da zanayene ke koyê cemedî parçeyê hurdî hurdî ê bêhûmare bîyo û êdî nîno taqîpkerdene.
A68 wexto ke temmuza 2017î de sînorê Antarktîkaye de sahaya parzemînê Larsen Cyî ra qerifîya, qasê 5 hezar û 800 kîlometreyan sey çargoşeyêk gird bî. Serra verêne aşma qanûne de ame vatene ke yew îhtîmal esto ke koyê cemedî Girava Georgia ya Başûrî ya başûrê Antarktîkaye bikewo û la dima ra semedo ke koyê cemedî parçe parçe bî no tehluke raşte ra wedarîya.
Xeylê zanistê cemedî dîyar kerdê ke qerifîyayîşê A68î ‘prosesêko xozayî’ yo û dayî zanayene ke semedo ke nizm o helîyayo. Çime: Rojnameyê Xwebûnî
