Qeyûmê Şaredariya Sûrê Abdullah Çîftçî tevî ku biryareke wezareta karên hundir a têkildar nîne jî, bi hincetên sosret nehişt ku endamên HDP’î yên Meclisa Şaredariya Sûrê tev li civînê bibin
Hevşaredarên Navçeya Sûr a Amedê Fîlîz Buluttekîn û Cemal Ozdemîr di 21’ê kanûna 2019’an de hatin binçavkirin û qeymeqamê Sûrê Abdullah Çîftçî jî weke qeyûm li şûna wan hate tayînkirin. Endamên HDP’î yên Meclisa Şaredariya Sûrê ji bo ku beşdarî civîna meha çileyê bibin, îro çûn avahiya şaredariyê. Endamên meclisê piştî kontrola di ketina avahiyê de, derbasî salona civînê bûn. Li endamên meclisê ku heta demekê li salonê rawestiyan nivîseke ku dîroka wê 21’ê kanûn bû, hate teblîxkirin.
Di nivîsa ku qeyûmê şarederiyê îmzekiribû de wiha tê gotin: “Weke ku di xala 38’emîn a Biryarnameya di Hukmê Qanûnê de (KHK) ya bi jimar 674’an ku di 01.09.2016’an de di Rojnameya Fermî ya bi jimara 29818’an de hatiye diyarkirin, ji ber ku li gorî xala 31’emîn a qanûna bi jimar 5393’yan peywir û rayeyên Meclisa Şaredariyê, encumen û komîsyonan ji hêla endamên encumenan ve tên birêvebirin, ji 21.12.2019’an û şûnde peywir û rayeyên Meclisa Şaredariyê, encumen û komîsyonan li gorî xala qanûna ku hatiye destnîşankirin, dê ji hêla Endamên Encumenan ve bên birêvebirin.”
Wezareta karên hûndir heya niha dar berê endamên meclisa şaredariyê ku ji peywirê bên girtin de tu biryar nedaye. Ji ber vê yekê ev biryara qeyûm jî neqanûniye û tu girîngiya xwe ya qanûnî tuneye. AMED
