Navenda Nûçeyan
Gelê Kurd ku wekî dareke hişk bibû û kesî bawer nedikir ku ji nû ve şîn bibe, bi damezirandina PKK`ê re dîsa zindî bû. PKK`ê di nava dilê Kurdan de cih girt û gel jî bû dildarê wê. Hin kesan jî ji ber hezkirina PKK`ê, bi helbest û stranan PKK`ê gihandin gel.
Yek ji wan kesan jî, Tacidîn Hisên e ku di sala 1953`an de li gundê Gir Mêr yê di navbera bajarê Hesekê û navçeya Amûdê yê Rojavayê Kurdistanê de ji dayîk bûye. Hisên ji bo debara jiyana xwe bike, li Lubnan, Îmarat, Şamê û herî dawî jî li Erebistana Siûdî kar kiriye.
Di sala 1973`an de dema ku Hisên li Sûriyê leşkerî ji hikumeta Şamê re dikir, li ser qenala BBC hat gotin ku li Bakurê Kurdistanê gel rabûye ser piyan. Dema Hisên dîmenî temaşe dike, ji eşq û şadbûnê hevoka “Va ye xortên kurdan rabûn, deşt û çiyan belav bûn” ji nava hinavên wî derdikeve.
Hisên di sala 1980`î de li Erebistana Siûdî endamekî tevgera azadiyê nas kir. Ew kes ji Tacidîn Hisên û hevalên wî yên karker re behsa Partiya Karkerên Kurdistanê (PKK) dike û bi wê yekê hezkirina PKK`ê di dilê Hisên de şîn dibe.
`Vaye PKK rabû`
Hisên li Siûdiyê wêneyê rêber Ocalan li ser dîwarekî dibîne û li wir rûyê rêbertiyê nas kir. Piştî demekê ji wê bûyerê dixwaze vegere Rojava, dema ku digihêje Şamê diçe mala mirovekî xwe û bi tesadufî rêber Ocalan li wir dibîne.
Piştî ku Tacidîn Hisên rêber Ocalan dibîne yekser nivîsa wî tê bîra wî, ji xwe re dibêje: “Va ye xortên Kurd bûn PKK`ê, va ye PKK`e rabû”. Ew di sala 1981`an de vê hevoka xwe temam dike û dike helbest.
Helbest wiha ye:
Va ye PKK`e rabû
Deşt û çiyan belav bû
Kulîlkên welat sor bû
Bilbil bi gulan şa bû
Wek şêran daketin şer
Hesinin dil û ceger
Bi şev pêde ranazin
Ta ku rojê bînin der
Hemû karkerên cîhan
Xortên rindî xwendevan
Dil şabûn bi şerê wan
Teva destê xwe da wan
Va bilbil dike fîxan
Mizgîn dide hevalan
Pîroz dike cejna wan
Sed her bijî Kurdistan
Keça Kurdî rojhilat
Xemla xwe daye welat
Mizgîn li te hevalê
Roja şadî va ye hat
Helbest bû stran
Ji eşqa dîtina serokatî û ji eşqa partiye ku wê çaxê gelê kurd li hêviya rêxistinekê bû ku karibe wan bi hev ve girê bide û wan ji bindestiyê xilas bike, baweriyeke mezin li gel Tacidîn Hisên çêbûbû ku PKK`ê wê gel ji zordestiyê rizgar bike.
Tacidîn Hisên di sala 1982`an de ew helbest nîşanî hunermend Xelîl Xemgîn kir ku wê demê bi hev re li Erebistana Siûdî kar dikirin. Xelîl Xemgîn li tembûra xwe dide û Hisên jî helbestê bi lêv dike, bi wê yekê biryarê didin ku wê helbest û awazê tomar bikin. Bi wê rengî ew helbest dibe stran.
Hisên ew kaset bi xwe re anî Rojavayê Kurdistanê û li malbat û dostên xwe belav kir, kesên dihatin cem wî jê ew kaset dixwestin. Heta gihaşt astekê ku kaset li cem wî bi xwe neman.
Yekemîn strana ku li ser PKK’ê hatiye derxistin
Hisên li Rojavayê Kurdistanê şehîd Mizgîn (Gurbet Aydin) nas dike. Şehîd Mizgîn bihîstibû ku Tacdîn ew helbest nivîsiye. Şehîd Mizgîn rojekê di civatekê de wê stranê bi dengê xwe yê xweş dibêje.
Ew helbest di sala 1983`an de bi dengê şehîd Sefqan û Mizgîn û bi awazekî din hate tomarkirin. Wê demê ew stran dengveda û heta niha tevî ku gelek stran hatine derxistin jî, lê belê ev strana herî zêde ye ku gel jê hez dike û bi coş û heyecan lê guhdarî dike. Strana “Va ye PKK`e rabû” yekemîn stran e ku li ser Partiya Karkerên Kurdistanê (PKK) hatiye derxistin.
Hisên da zanîn ku PKK`ê ji bo miletê kurd hêvî ye û wiha got: “Dema ku PKK`ê hat damezirandin milet pir pê kêfxweş bû, hêviyek da gel. Heta roja îro jî baweriya milet xurt e ku ev partî wê me re azadî û serkeftinê bîne.”stranê guhdar dike. Lê gelo hûn dizanin çîroka gotinên vê stranê çawa derket û kê çêkiriye?
