Li Şaredariya Bajarê Mezin a Wanê ya ku hate xespkirin hemû serokên daîreyan û gerînende ji kar hatin stendin. Gelek xebatkarên şaredariyê jî hatin binçavkirin
Qeyûm û waliyê Wanê Mehmet Emîn Bîlmez ê ku li şûna Hevşaredara Bajarê Mezin a Wanê Bedîa Ozgokçe Ertan hat wezîfedarkirin, hemû serokên daîreyan ên di dema HDP’ê de ji kar avêt.
Qeyûmê xespkar 12 serokên daîreyan, sekreterên giştî û gelek gerînende ji kar avêt û kesên di dema qeyûm de wezîfedar kir. Qeyûm, Ulker Cem Kaplan ê ku bertîlstendina wî di qeydên deng de derketibû holê ew kir Gerînendeyê Giştî yê VASKÎ’yê û Salîh Allahverdî jî kir Sekreterê Giştî.
Di destê sibehê de polîsan girtin ser mala gelek kesên ku hatine îxrackirin. Li gorî agahiyên pêşîn Hevserokê Tumbel-Senê yê Wanê Şukru Kaçici, xebatkarên şaredariyê Çîmen Umît, Cahît Dûran, Veysel Engîn jî hatin binçavkirin. Piştî binçavkirinê qedexeya parêzer û biryara nepenbûnê danîn ser dosya. Hate diyarkirin ku xebatkarên şaredariyan hê jî tên binçavkirin.
Di çalakiyên protestoyê yên duh de şêwirmendên parlementeran jî di nav de niha 32 kes li TEM’ê ne. WAN
